COST fundur í Gunnarsholti

7. september 2015 / Í liðinni viku var haldinn vinnufundur í evrópska COST-verkefninu „Connecteur” í Gunnarsholti. Þátttakendur voru alls 24 og komu frá 13 löndum. Connecteur COST verkefnið gengur meðal annars út á að skoða flæði vatns innan vistkerfa og þá sérstaklega hvernig best sé að hægja á afrennsli t.d. eftir úrkomu svo sem mest af henni sitji eftir á því svæði þar sem hún féll (bætt ísig vatns eða snjósöfnun til dæmis). Í þessu samhengi skiptir jarðvegsgerð, gróðurþekja og tegundasamsetning mjög miklu máli. Rangárvellirnir urðu því fyrir valinu sem eitt af rannsókna- og fræðslusvæðum verkefnisins.

Þess má geta að þátttakendurnir í vinnufundinum í Gunnarsholti eru flestir með bakgrunn í líkanagerð og voru að skoða hvaða gögn eru tiltæk af Rangárvallasvæðinu sem hægt væri að nýta í að gera þokkalega nákvæmt spálíkan af vatnasviði Rangánna beggja. Þórunn Pétursdóttir, sérfræðingur hjá Landgræðslunni, sagði að þessi vinna nýttist Lr mjög vel í verkefnum á vegum stofnunarinnar, en skortur er á upplýsingum um vatnshag raskaðra og uppgræddra svæða. Þórunn sagði að það yrði áframhald á þessari vinnu sem vonandi mun skila a.m.k. vel útfærðri hugmynd af spálíkani fyrir Rangárvellina.

Þessi vinnufundur var formlega haldinn af Háskólanum í Reykjavík í samstarfi við Þekkingarsetur Landgræðslunnar.

Heimasíða COST-verkefnisins
http://connecteur.info/